Sogn Rupert, arzuestg da Salzburg.

pdf: cheu l’entira historia Ils 27 da mars: Sogn Rupert, arzuestg da Salzburg

Sogn Rupert che deriva da nobla casa, era parents culs retgs dalla Frontscha. Gia da giuven ensi eis el vivius en tema da Diu cun tener devoziuns e far ovras da misericordia. El ei daventaus spiritual e cun sia sontga veta staus a tuts in marviglius exempel. Sia pietad, siu laud e grond num han fatg ch’el ei entuorn igl onn 600 daventaus uestg da Worms en la Germania. Quei uffeci ha el adempliu sco um gest, sincer e devozius. Quei che Rupert mussava cun plaids, cumpleneva el sez cun fatgs e menava cheutras biars sin la via dil perpeten salit. Quei pudevan ils stinai nuncartents buca vertir ed han entschiet a persequitar groppamein il sogn uestg. Gie, la finala han els gheslegiau e scatschau el ord il marcau. Sogn Rupert tut consolaus da saver pitir per amur da Diu, ha surpriu in’autra vegna dil Segner per cultivar. Il nuncartent duca Teodone da Pejerland cloma il sogn uestg en sia tiara. Lez selegra da quei cun la speronza da purtar bien fretg e gudignar biaras olmas. Sogn Rupert surlai sias nuorsas ad in auter bien pastur e semetta sin via viers Pejerland. Teodone auda dalla vegnida dil sogn e va cun sia entira cuort encunter per retscheiver il sogn missiunari cun tutta pumpa. Il sogn prelat ei denton buca vegnius per esser honoraus, mobein per pescar olmas. Per quella finamira gigina el, dat ductrina e muossa quala seigi la suletta vera cardientscha. Il duca ed aunc biars auters da sia cuort suondan ils mussaments da sogn Rupert, selain instruir e battegiar. Ussa schubregia il sogn ils tempels dil dieus fauls, benedescha e consecrescha quels en honur dil ver Diu, da Nossadunna ed auters sogns. Da Regensburg anora va sogn Rupert en auters marcaus dalla Baviera entochen en Ungaria a perdagond il sogn evangeli. Talas missiuns fageva el buca senza converter e battegiar rehamein olmas. Dapertut ha el baghegiau baselgias e claustras ed empleniu quellas cun sogns paders ed augsegners. Duca e pievel rogen sogn Rupert da baghegiar a Salzburg ina baselgia da sogn Pieder per dar in’entschatta agl uestgiu. Sco emprem uestg regia el la Baselgia sontgamein e meina bunamein igl entir pievel da Pejerland tier Cristus. La gronda ovra che vegn mai emblidada ei quella che sogn Rupert ha tschentau Nossaduna, la Regina dil tschiel per patruna dalla Baviera. En honur da Maria ha el baghegiau ad Ettingen ina caplutta. Quella ei daventada dapertut enconuschenta, muort las miraclas sin intercessiun dalla gloriusa Regina dils aunghels. Havend sogn Rupert sco uestg ed apiestel, luvrau biars onns en honur da Diu e per il salit dallas olmas retscheiva el ina revelaziun cura ch’el hagi da murir. Ina nauscha febra mulesta el duront il temps da cureisma. La fiasta da Pastgas celebrescha el aunc la sontga messa, admonescha il pievel leu present e recamonda a Diu la baselgia da Salzburg. Lu passa il sogn tier la fossa gia pinada e miera leu sin peis en la bratscha da ses spirituals. Ils 27 da mars digl onn 628 ei sia virtuusa veta ida a fin e si’olma han ils aunghels purtau veseivlamein a tschiel. Zun biaras miraclas ein daventadas leu tras ils merets da sogn Rupert.