Sogn fra Clau da Flia, confessur.

pdf: cheu l’entira historia Ils 22 da mars: Sogn fra Clau da Flia, confessur
Sogn fra Clau astgan ins mirar per patrun da mintga stan. Quei marviglius survient da Diu ei naschius ils 21 da mars digl onn 1417 a Flia. Aunc el best dalla mumma ha Clau viu caussas marvigliusas, sco per exempel il tschiel cun bialas steilas e denter quellas ina pli gronda e tarlischonta che las autras. Ina tala steila ha el lu era pli tard viu en siu eremitadi. Cun quei leva il tschiel mussar che Clau hagi cun sia virtuusa veta da tarlischar per tut il mund. E quei ha il giuven Clau lu era demussau cun daventar a tuts in ver spieghel da vertids. Sia veta fuva mudesta, tgeua e pleina d‘oraziun. La damaun marvegl teneva el sias oraziuns avon che ir a far las lavurs da pur, sco quei ch’ellas sedevan. Adina era siu spért alzaus tier Diu. Gia en ses giuvens onns entscheiva Clau a mortificar siu tgierp cun giginas ed abstinenzas e quei quater dis ad jamna. Cheu lai Diu en visiuns saver ch’el vegni a clamar el en ina veta retratga. Per obedir als geniturs marida Clau la dunna Dorotea e schendra cun ella 5 buobs e 5 mattatschas. Duront las duas uiaras dils onns 1444 e 1460 s‘engascha sogn Clau ferm pil beinstar dalla patria e quei buca mo sco schuldau dil mund, mobein era da Diu. Tras siu riug e siu cussegl han tuttas dispetas denter ils Svizers pigliau ina fin. Suenter quellas uiaras ei il sogn pliras ga vegnius clamaus da retscheiver ils emprems e honoreivels uffecis dalla tiara. Denton avon il mund ha fra Clau mai vuliu esser gronds. El saveva che scuidonza e malvuglientscha fetschien savens daventar il malgest gest, la verdad manzegna ed il bien entiert. Perquei sedecida il sogn da viver cun sia dunna e ses affons en ferma disiplina cristiana. Cu tus durmevan, bandunava el tgeuamein la combra ed urava en schanuglias entochen la damaun. Quei sogn viver ha il nausch naturalmein hassegiau e pliras ga cun far dagrettas empruau da metter il sogn um en gretta e malpazienzia. Mo gnanc il bastunar e morder ha pudiu muentar il sogn tier nauschs plaids. Muentaus tras divinas visiuns e cun lubientscha da sia dunna dat el il pietigot als da casa, parents e vischins e serenda a pei blut senza daners e vivonda en in criu e mitgiert solitari dalla Val Melc. Pauc suenter ha il cumin da Flia baghegiau leu ina caplutta cun ina cella per il beau fra Clau, pertgei il pievel teneva el en gronda veneraziun. Il sogn um sevestgescha cun ina rassa groppa e metta per letg sulet ina aissa ed in crap per suttatgau. Leu giu el Ranft retscheiva il sabi e sogn fra Clau da tutta glieud, patriots ed jasters per dar ad els cussegl e confiert. Naven da mesanotg entochen miezdi s’occupescha el cun urar, meditar e far exercezis spirituals. Il suentermiezdi dat el audienza als pelegrins. Denton quei che fa smarvigliar il pli fetg ei, che fra Clau ha viviu en quei eremitadi entuorn 20 onns senza vivonda humana, sulettamein dil sontgissim Sacrament digl altar. Tras quei paun divin e cun meditar profundamein la passiun e mort da Cristus, retscheiva el en siu cor in tal confiert, che ha mai schau sentir el ni fom ni seit. Era sch‘il tgierp pareva zun maghers, semanteneva el en sia fermezia, possa e sanadad. Diu ha honorau siu survient cun visiuns, revelaziuns e cun il dun da profetisar. Era sch’el era buca in studegiau, explicava el damondas e misteris schi bein sco ils docturs. Fra Clau salidava savens Nossadunna e la corda da paternos teneva el adina enta maun urond il sogn rusari. Per treis caussas engraziava il beau cuntinuadamein, numnadamein ch’el ha saviu bandunar dunna ed affons, da mai esser staus tentaus da turnar a casa e da saver viver mo dalla sontga hostia. Ord ina revelaziun ha fra Clau saviu ch’el vegni buca pli che 70 onns vegls. Ina greva e dolorusa malsogna tacca siu tgierp. E daveras, el finescha sia sontga veta ils 21 da mars digl onn 1487, gest sin siu 70avel di da naschientscha. Il sogn vegn satraus a Sachseln en la baselgia da sogn Teodul avon igl altar da Nossadunna. Sin quei di ein biaras miraclas daventadas per confirmar ils aults merets e la gronda sontgadad da fra Clau da Flia, quei grond survient da Diu.