Sogn Hermenegild, retg e marter. pdf: cheu l’entira historia Ils 13 d’avrel: Sogn Hermenegild, retg e marter Quei sogn ei staus fegl dil retg Leovigild dalla Spagna, in ver Arian heret. El ha partiu …Daplü
Sogn Hermenegild, retg e marter.
pdf: cheu l’entira historia Ils 13 d’avrel: Sogn Hermenegild, retg e marter
Quei sogn ei staus fegl dil retg Leovigild dalla Spagna, in ver Arian heret. El ha partiu siu reginavel en treis parts e dau duas a ses fegls. Hermenegild daventa aschia a Seviglia retg dalla Andalusia. Igl onn 579 sespusa el cun ina princessa catolica dalla Frontscha. La madregna dil spus che fuva Ariana, odiava ella ed empruava cun tuttas modas da far dar si ella la cardientscha catolica. Sinquei bandunan els la casa paterna e van a Seviglia. La princessa ch‘era ussa libra e devoziusa ha cun agid digl uestg sogn Leander, saviu volver siu mariu tier la cardientscha catolica. Cuort sisu ha il bab enderschiu che siu fegl seigi daventaus catolics. El tarmetta in ambassadur tier siu fegl cun ina brev co in fegl hagi da sedepurtar viers in bab. Hermenegild engrazia al bab per tut il bien fatg, metta denton vitier che Diu seigi il Bab da tuts babs ed el suondi sco emprem quel e quei entochen la mort. Plinavon speri el che buca mo la cuort, mobein siu entir pievel daventi catolics. Che quei vilenti il bab ha el saviu e perquei tarmetta il sogn sia dunna cugl affon pign vi ell’Africa. El sez fa ina allianza culs Romans per saver sedefender. Mo siu bab cumpra discusamein ora quels Romans ed auters catolics che vevan avon empermess agid a siu fegl. Cun ina gronda armada ha el schau bloccar Seviglia in entir onn, entochen ch’il fegl ha muort munconza da vivonda stuiu sesurdar. Hermenegild ei fugius tiels Romans, mo ha spert viu che quels tradeschan el al bab. Sinquei fui el a Cordoba e da leu cun 300 umens ad Osuna. Siu davos refugi anfla el en ina baselgia enconuschenta tras miraclas. Il bab tarmetta l’auter fegl en quella baselgia cun empermetter da perdunar, sch’el vegni e roghi per perdun. Hermenegild ha cartiu e rugau il bab per perdun. Cun tuts buns plaids rabetscha el faulsamein siu fegl tier il camp da sia armada. Strusch staus leu, lai el metter el en perschun. Tuts rampins dil bab da vuler far turnar siu fegl tier la religiun ariana han gidau nuotzun. Sinquei camonda il tiran d’in bab da serrar el en la perschun dils gronds malfatschents, che vegnevan maltractai groppamein. Cheu en quei miserabel liug seprepara Hermeneegild per la davosa battaglia. Cun la speronza che la perschunia hagi muentau siu fegl da midar meini, tarmetta lu il bab sin Sonda sontga in uestg arian e heret en perschun cun la communiun. Il sogn schuldau da Cristus turzegia quei heret e di ch‘el vegli viver e murir sincer sco ver catolic. Aunc lezza notg tarmetta il ravgiau bab ils hentgers en perschun per schar scavazzar siu fegl. Ei fuva ils 13 d’avrel, la notg da Pastgas digl onn 586. Glischs han sclariu giu da tschiel la perschun ed aunghels ein cumpari maiestus e dau perdetga dalla gloriusa victoria dil sogn. Il sogn tgierp vegn veneraus a Seviglia, il tgau denton a Zaragoza. Biaras e grondas miraclas ein lu daventadas sin intercessiun da quei grond schuldau da Cristus.
pdf: cheu l’entira historia Ils 13 d’avrel: Sogn Hermenegild, retg e marter
Quei sogn ei staus fegl dil retg Leovigild dalla Spagna, in ver Arian heret. El ha partiu siu reginavel en treis parts e dau duas a ses fegls. Hermenegild daventa aschia a Seviglia retg dalla Andalusia. Igl onn 579 sespusa el cun ina princessa catolica dalla Frontscha. La madregna dil spus che fuva Ariana, odiava ella ed empruava cun tuttas modas da far dar si ella la cardientscha catolica. Sinquei bandunan els la casa paterna e van a Seviglia. La princessa ch‘era ussa libra e devoziusa ha cun agid digl uestg sogn Leander, saviu volver siu mariu tier la cardientscha catolica. Cuort sisu ha il bab enderschiu che siu fegl seigi daventaus catolics. El tarmetta in ambassadur tier siu fegl cun ina brev co in fegl hagi da sedepurtar viers in bab. Hermenegild engrazia al bab per tut il bien fatg, metta denton vitier che Diu seigi il Bab da tuts babs ed el suondi sco emprem quel e quei entochen la mort. Plinavon speri el che buca mo la cuort, mobein siu entir pievel daventi catolics. Che quei vilenti il bab ha el saviu e perquei tarmetta il sogn sia dunna cugl affon pign vi ell’Africa. El sez fa ina allianza culs Romans per saver sedefender. Mo siu bab cumpra discusamein ora quels Romans ed auters catolics che vevan avon empermess agid a siu fegl. Cun ina gronda armada ha el schau bloccar Seviglia in entir onn, entochen ch’il fegl ha muort munconza da vivonda stuiu sesurdar. Hermenegild ei fugius tiels Romans, mo ha spert viu che quels tradeschan el al bab. Sinquei fui el a Cordoba e da leu cun 300 umens ad Osuna. Siu davos refugi anfla el en ina baselgia enconuschenta tras miraclas. Il bab tarmetta l’auter fegl en quella baselgia cun empermetter da perdunar, sch’el vegni e roghi per perdun. Hermenegild ha cartiu e rugau il bab per perdun. Cun tuts buns plaids rabetscha el faulsamein siu fegl tier il camp da sia armada. Strusch staus leu, lai el metter el en perschun. Tuts rampins dil bab da vuler far turnar siu fegl tier la religiun ariana han gidau nuotzun. Sinquei camonda il tiran d’in bab da serrar el en la perschun dils gronds malfatschents, che vegnevan maltractai groppamein. Cheu en quei miserabel liug seprepara Hermeneegild per la davosa battaglia. Cun la speronza che la perschunia hagi muentau siu fegl da midar meini, tarmetta lu il bab sin Sonda sontga in uestg arian e heret en perschun cun la communiun. Il sogn schuldau da Cristus turzegia quei heret e di ch‘el vegli viver e murir sincer sco ver catolic. Aunc lezza notg tarmetta il ravgiau bab ils hentgers en perschun per schar scavazzar siu fegl. Ei fuva ils 13 d’avrel, la notg da Pastgas digl onn 586. Glischs han sclariu giu da tschiel la perschun ed aunghels ein cumpari maiestus e dau perdetga dalla gloriusa victoria dil sogn. Il sogn tgierp vegn veneraus a Seviglia, il tgau denton a Zaragoza. Biaras e grondas miraclas ein lu daventadas sin intercessiun da quei grond schuldau da Cristus.