Sontga Onna, mumma da Maria, mumma da Diu.

pdf: cheu l’entira historia
Ils 26 da fenadur: Sontga Onna, mumma da Maria, mumma da Diu

Sontg’Onna ei naschida a Betlehem e fuva dalla schlateina da Giuda. Il bab Matan dalla schlatta Levi e dalla famiglia da Aron era sacerdot a Betlehem, ferton che la mumma Maria era dalla schlateina da Giuda. Quella benedida lètg ha schendrau treis feglias: Maria, mumma da sogn Giachen il pign, da sogn Giudas Tadeus e da sogn Simeon uestg da Gerusalem. La secunda feglia Sobe ch’ei daventada mumma da sontga Elisabeth e la tiarza feglia fuva sontga Onna ch’ei stada la mumma da Nossadunna, mumma da Niessegner Jesus Christu. Strusch naschida ha Diu dau enzennas ch’el vegli favorisar ella cun specialas grazias. Siu grond plascher fuva da star persula ed untgir il spassatemps cun esser devoziusa e luvrusa. Ella havess bugien salvau il pepeten purschaladi era sche quei vegneva avon la naschientscha da Cristus pauc praticau. Mo la divina providientscha ha vuliu che sontga Onna daventi spusa da sogn Giohen a Nazaret en Galilea che fuva dalla casa da David. Sco sogn sogn Giohen urava sil cuolm e supplicava il tschiel per la vegnida dil Messias, aschia steva era sontga Onna retratga en siu iert ed urava e supplicava ch’il Spindrader dil mund pudessi gleiti vegnir. La sontgadad da quella lètg ei vegnida dil tschiel encorunada cun ina greva crusch. Dapi 40 onns eran ei gia maridei ed els havevan aunc adina negins affons. La nunfritgeivladad vegneva da gliez temps tenida dils farisès per in schan e smaledicziun da Diu. Sontg’Onna roga il tutpussent Diu da mirar sin ella cun in egl grazius e misericordeivel e conceder ad ella in affon. Era vegli ella unfrir si a Diu quei affon per il survetsch al tempel. L’oraziun vegn exaudida da Diu ed in aunghel cumpara a sogn Giohen sco a sontga Onna e consolescha els cun schar saver che Diu vegni a regalar ad els ina feglia. Cuort temps suenter ei sontg’Onna vegnida purtonta ed ha lu parturiu la feglia Maria ch’ei daventada la mumma da Diu. Els schevan buca sut da ludar Diu ed d’engraziar a Diu per quella schi preziusa benedicziun dad esser ussa deliberai da quei schan dalla nunfritgeivladad. Mo aunc pli gronda fuva la legria en tschiel dils aunghels che vesevan Maria senza macla concepida e gia eligida per mumma dil vierv divin incarnau e per regina dil tschiel e dalla tiara. Vegnend la feglia Maria treis onns, ha la sontga mumma Onna schau vegnir endamen sia empermischun ch’ella veva fatg a Diu. Ella meina quei carezau scazi, la suletta feglia Maria a Gerusalem per presentar ella leu al survetsh dil tempel. Maria vegn tschentada tier las autras purschalas en in survetsch dapersei per survir a Diu sut la direcziun dils ministers dil tempel. Segiramein ina dolorusa unfrenda cun dar a Diu quei che fuva ad ella il pli car sin quest mund. Suenter quei grond sacrifeci han sogn Giohen e sontg‘Onna bandunau Nazaret e secasai a Gerusalem per esser pli damaneivel dil tempel. Sogn Giohen ei morts avon che sontg’Onna che ha lu cuntinuau sia veta …