Sontga Brida, purschala.

pdf: cheu l’entira historia
Ils 1 da fevrer: Sontga Brida, purschala

La veta da quella sontga era aschia: Duptac, in um dalla Scozia, veva cumprau ina femna sclava. Quella era biala ed haveva ina buna demanonza. Siu patrun era buns cun ella, mo ha mess ella en purtonza. Vesend la dunna da Duptacus il mal daventau, ha ella sevilau aschi fetg, entochen che la sclava ei vegnida scatschada ord casa. Cul temps ei staus cheu, ha ella parturiu ina feglia e numnau quella Brida. Cura che la buoba ei stada pli gronda, ha il bab Duptac priu ella en sia casa e giu quitau da siu affon. Brida fuva in affon mudest, obedeivel e tgeu; ella tschintschava pauc ed era zun pietusa culs paupers. Ella spargnava vid sia spisa per saver parter culs paupers ed era tut quei ch’ella survegneva dil bab parteva ella culs auters. Brida fuva da natira ina bein formada persuna, veva ina fina e biala fatscha e buntadeivels egls che tut vuleva mo bien dad ella e biars vessan bugen priu ella per spusa. Mo Brida veva priu en egl da sespusar sulettamein cun Jesus Cristus. Per buca vegnir mulestada dils umens, ha ella rugau tier Diu e bargiu entochen ch’ella ha piars l‘aua d‘in egl. Lu ei la sia bellezia stada naven ed ella ha giu ruaus dils umens. Da quei ei Brida selegrada ed ida bein gleiti tier igl uestg Marchilla e supplicau lez per il vestgiu da muniessa. Il sogn uestg ei cuntents da quei e va en baselgia cun Brida che vegn cumpignada aunc dad autras purschalas. Marchilla vesa sur il tgau da Brida ina petga da fiug che sclareva sin tuts mauns. Cura che Brida sbassa il tgau e tucca cun in maun il pass digl altar, ei quei lenn sec ladinamein vegnius verds, siu egl piars sauns e sia fatscha biala sco avon.
Con consolada che Brida fuva sco muniessa, san ins buca declarar mo cun paucs plaids, pertgei ella viveva en sontgadad. Las nundumbreivlas miraclas che Diu ha fatg tras sia casta spusa, dattan perdetga da ses aults merets e sias biaras vertids. Cheu mo in per exempels:
Ina nobla giuvna da dudisch onns ch’era naschida metta, retscheiva la vusch suenter che Brida ha giu dumandau sch’ella lessi per amur da Diu salvar la castiadad. Ina schliata dunna che veva parturiu in affon speras o, dat en sco bab il num d’in uestg. Sontga Brida cloma la schliata femna e damonda en tutta migeivladad, qual che seigi veramein il bab da quei affon. Senza turpetg di la dunna puspei che tal uestg segi il bab. Sontga Brida fa l’enzenna dalla sontga crusch sin la lieunga digl affon ed en quei mument ha el plidau, dau perdetga encunter sia mumma e detg: Buca in uestg eis ei, mobein in um da pauca valeta. In’autra ga ha ella cun aua benedida dau la vesida a dus tschocs. Sia ferma cardientscha ch’ella veva en Diu, fageva tuttas creatiras obedeivlas. Las malsognas e las mendas dalla glieud vegnevan pridas naven, las caussas piarsas u enguladas puspei anfladas ed era ils animals obedevan ad ella.
Reha en vertids e pleina da sontgadad eis ella finalmein arrivada alla fin da sia veta. Ella ha saviu dir, tgei di ch …