Sogn Hieronimus Emilian, confessur.

pdf: cheu l’entira historia
Ils 21 da fenadur: Sogn Hieronimus Emilian, confessur

Sogn Hieronimus ei staus in niebel Venezianer e naschius igl onn 1471. El fuva pietus e veva gia en ses giuvens onns entschiet culs studis. Cun la mort dil bab dat el si ses studis e va cun 14 onns en survetsch dall’armada. Sco schuldau ha el plaun a plaun piars la devoziun e la tema da Diu ed entschiet ina veta libra. Tut las admoniziuns da sia mumma e da ses frars gidavan nuot. El fageva mo aunc dapli resistenza e metteva tut sutsura. Igl onn 1508 ha imperatur Maximilian instradau ina greva uiara encunter ils Venezians. Hieronimus daventa capitani e cumandant dil marcau Castelnuovo. Cun ses 300 umens ha el sespruau da defender la lingia Trevisana, mo sto la finala ceder e daventa perschunier. Ligiaus vid peis e mauns cun cadeinas e cun in tscherchel da fier entuorn culiez, vegn Hieronimus serraus en ina stgira perschun e tenius mo cun paun ed aua. Cheu entscheiva el ad ir en sesez e senta che la giustia divina veva mess maun vid el. Diu che vul buca la mort dil puccont, mobein la conversiun, ha confortau il perschunier e mussau ad el da sevolver tier Maria purschala. Quella mumma dils pucconts ha Hieronimus uss eligiu per sia mussadra, advocata e mediatura. Cun gronda ricla fa el uss l’empermischun dad ir a pei blut a Treviso en la baselgia da Nossadunna e schar celebrar sontgas messas, sch’el vegni vivs ord questa perschun. In di che Hieronimus urava culs egls plein larmas ei la mumma dalla misericordia cumparida ed advertiu el da tener fideivlamein sias empermischuns. Lu ha ella purschiu ad el las clavs per sedeliberar dallas cadeinas e dalla perschun. Liberaus dalla perschunia ha el priu cun el cadeinas e tscherchel e semess sin via encunter Treviso. Mo dapertut sin las vias fuvan guardias e schuldada. El sevolva tier la purschala Maria e roga per agid. La mumma da Diu cumpara, peglia pil maun e meina Hieronimus permiez igl inimitg ora entochen a Treviso. En baselgia da Nossadunna depona el si sias cadeinas e procura per las sontgas messas. Lu va el a Venezia e palesisa dapertut ils benefecis che Maria veva fatg cun el. Hieronimus daventa guvernatur da Castelnuovo. Denton ei siu frar morts e sinquei dat Hieronimus si siu guvern e tuorna a Venezia sco ugau da ses nevs. Da cheu naven viva el mo pli pils paupers, orfans e basignus. L‘oraziun ha el denton buca emblidau e quella fagieva el savens avon il cruzifix. Da quei temps conversava Hieronimus cun dus virtuus umens che vevan baghegiau a Venezia in spital. Quels dus sogns umens han lu surdau a Hieronimus il guvern da quei spital. Lu eis el che veva dau naven tut, semess sin via els gronds marcaus denter Venezia e Milaun, per rimnar malsauns ed orfans ed ereger las casas necessarias per quella paupra glieud. Finalmein ha Hieronimus priu dimora a Somasca sper Venezia, nua ch’el ha lu fundau la comunitad dils Somasco. Quei fuva ina gruppa da pietus umens che gidavan orfans e bandunai tier in mistregn. Cun quella caschun instruevan quels umens era la ductrina ed ils misteris dalla cardientscha catolica. Igl onn 1537 ei ina pestilenza rutta ora che ha lu era taccau sogn Hieronimus. Lu ha el saviu tgei di ch’el hagi da murir e ha vuliu esser provedius culs sogns Sacraments. Aunc quei medem onn sils 7 da fevrer, ha el rendiu si’olma a Diu en la vegliadetgna da 56 onns. Il tschiel ha lu honorau siu survient cun biaras miraclas, tras las qualas el ei vegnius canonisaus da papa Clemens XIII. Igl onn 1928 ha papa Pius XI. nominau sogn Hieronimus per patrun dils orfans.