Sontga Maria Madleina, penitenta.

pdf: cheu l’entira historia
Ils 22 da fenadur: Sontga Maria Madleina, penitenta

Sontga Maria Madleina vegn ludada egl evangeli muort sia carezia ch’ella ha giu enviers nies divin Spindrader. Ella ei naschida damaneivel da Gerusalem ord ina reha familia. Lazarus e Marta fuvan ils fargliuns da Maria Madleina. Suenter la mort dils geniturs han ils treis affons partgiu la jerta denter els. A Maria Madleina ha ei tuccau il casti da Magdala en la provinzia da Galilea e da cheu deriva siu secund num. Damai ch’ella fuva reha, nobla, biala e legra, tedlava ella buca sin las admoniziuns da ses fargliuns. Ella ei seretratga en siu casti per saver guder la libertad. Cun sia veta ch’ella menava leu era Madleina enconuschenta en Galilea per ina femna scandalusa e pucconta. Sco sogn Lucas e sogn Marcus scrivan, ha Jesus giu scatschau siat demunis ord quella pucconta. Cristus ha cun ses priedis e sias miraclas fatg curascha a Madleina da vegnir tier el. Ella fa ricla e penetienzia. Udend che Jesus seigi envidaus a meisa tier il farisè Simon, ha ella priu in vischi plein custeivel ieli ed ida en casa dil farisè. Leu sefiera ella giu avon Jesus, lava ad el ils peis cun sias larmas, schigenta cun ses cavels ed unscha en in ieli prezius. Da quei vevan ils farisès pauc respect e tertgavan che Jesus sappi buca tgei pucconta che Madleina fussi. Mo Jesus ha enconuschiu la luschezia dils farisès e defendiu la pucconta schend: Tia cardientscha ha salvau tei, va en pasch e fai buca pli puccau. Da quella conversiun dat il sogn evangeli perdetga, cura che Jesus ei ius a Betania en casa da Marta, nua che Madleina seseva sper ils peis da Jesus e tedlava ses plaids. Ella desiderava da saver adina star sper Jesus. Era dalla carezia da Jesus tier Madleina plaida igl evangeli, cura che Madleina cloma Jesus tier il frar Lazarus che fuva morts ed el vegn leventaus ord fossa. Medemamein il temps dalla passiun, cura che tuts fugevan, suandava Madleina Jesus ed ei stada entochen la fin cun Maria sut la crusch. Lu ha ella cumprau las preziusas spezarias per balsamar il tgierp da Jesus, mo buca anflau el. Sinquei ei igl aunghel cumparius ad ella e detg che Jesus seigi levaus da mort en veta. Sogn Pieder e sogn Gion ch’eran vegni pli tard han lu bandunau la fossa ensemen cun las autras dunnauns. A Madleina che steva ussa persula e tresta anavos, ei Cristus cumparius ed ella ha buca enconuschiu siu divin spus. Ord cumpassiun ha Jesus clamau ella per num e lu cumandau dad ir ad annunziar sia levada a ses giuvnals. Dacheudenvi eis ella setenida si a Gerusalem cun Maria la mumma da Diu. Bugen fuss Madleina stada per adina leu. Mo suenter il marteri da sogn Stiafen han ils gedius persequitau tuts fideivels. Ella ei vegnida pigliada cun siu frar Lazarus e sia sora Marta. Ensemen cun auters cristians vegnan el menai ora sin l’aulta mar en ina veglia nav senza palas e tendas, sperond ch’ei mondien sutsu. Mo Diu ha menau la nav segiramein entochen a Marseille en Frontscha. Entras quella miracla ein biars da quei marcau seconverti. Lazarus ch’era gia consecraus dils apostels per uestg, ei restaus leu a Marseille. Maria Madleina ei seretratga en in solitari e vivida leu 30 onns ina strentga veta da penetienzia. Savens vegneva ella visitada dils aunghels che alzavan ella ad ault per schar tedlar la dultscha musica dil parvis. Suenter quels 30 onns ha Diu revelau a Maria Madleina l’ura da sia mort ed ils aunghels han purtau ella en baselgia ad Aix. Leu ha ella retschiert ils sogns Sacraments e morta ils 22 da fenadiur digl onn 84. Ed en quella baselgia ei siu tgierp lu vegnius satraus. Oz sesanflan las reliquias da sontga Madleina veneradas e la basilica Maria Magdalena a Vézelay en la Burgunda.